CAPACITY

Ababa nga Ababa a Sarita (Imbiit a Sarita)

ni Derick Thor Yabes

"Sakbay koma a nagsakayka, nagdamagka koma pay nga umuna. Saan a kasta a daddadaelem ti orasko," ingngerngerna.

"Sigurado manen 'ta batil-patung!" insanapsap ti panunot ni Sabas. Agasem, nayat iti "capacity" daytoy nailuganna ita a dimsaag iti Dangaw Transit itay. Manipud nasursurona ti istayl dagiti traysikelan ditoy Siudad ti Tuguegarao, kanayonen a mamutittit ti bolsana. Mabalin payen a pagilig-isan iti kuto ti boksitna uray kasla palito laeng no maiyabay kadaytoy nakabakbaked ken kasla gimmubang nga apuyen a pasaherona.

"Ditoyen, bro," inkalbit ti lalaki a nakadungkog iti uneg ti saydkarna. Kasla Kenny Rogers ti boses daytoy ngem no iti langa, kasla kabuteng a pagtubuan ti barbas ti nakalinlinis a rupana. Kasla met Wesley Snipes ti panagbubuok ken ak-akadna. Impaigidna ti traysikel iti batog ti kakomanan. Awan makita a balay iti asideg.

       

"Mano itayen ti pagpletek, Manong," kinuna ti lalaki iti nalamiis a boses.

       

"Capacity laeng, ading." Nadayaw met daytoy, naisipna.

       

"Ania kadi dayta capacity, Manong?" Inunton manen ti lalaki. Nagmayat man ti panangkepkep ti nangisit a balat a diaket iti kasla natubtubay a pammagi daytoy. Ngem naguguapoak latta, impangas ni Sabas iti bagbagina. Agasem, no naluklukmeg la bassit, maysa laengen a digosan ti pangabakan ni Coco Martin kaniana! Uray agdadatanto met laeng a pimmalatang ti agongna.

       

"Umanay kadi daytoyen, Manong?" Inyawat ti lalaki ti naranghado.

       

"Ay, agkurang, a," medio ngimmato ti bosesna. "Masapul a bayadam ti lugar a malaon 'toy luganko. Agkurangka pay treinta," insilpona.

       

"Ket no dies sa met laeng ti plete, 'Nong, nalamiis latta ti boses ti lalaki nga iti likudanna mangrugin nga agmurmuray ti sinamar nga inulsan ti naingpis nga amor.

       

"Sakbay koma a nagsakayka, nagdamagka koma pay nga umuna. Saan a kasta a daddadaelem ti orasko," ingngerngerna. Bimmaba iti traysikel ta dimmagsen ti pus-ongna.

       

"Agkurang met, 'Nong," medio timmangken ti boses ti lalaki. "Porti-payb laeng 'toy dalak!" Inuksobna ti diaketna.

       

Saan a naituloy ni Sabas ti panangipatan-awna iti karuotan ti tarakenna gapu iti nasiputanna a nakasabbikel iti lalaki. Nagayus ti nabara iti sakaananna.#

Saan Kano nga Immala

(Ababa nga ababa a sarita ni Derick Marcel F. Yabes)

“’Nang, zero-nak, yo’” makaluluasit ni Jethrix. Innala ni inangna ti awitna a bag.

NAPASUNGADAN ni Ester ni Jethrix a nakakarkaranting a naggapu’t eskuela. Pinaatiddag pay ti nakagaygayad nga isemna ti pangatiddogen a timidna. Nagmayat man ti widawid dagiti narapis nga imana a kumkumpasan met ti kinursing a sakana.

“’Nang! ‘Nang! Nag-test-kami itay ket nakalaklaka met,” impasabat ni Jethrix a nangibukirad iti kasla naiyuged laeng a matana. Arig ipukkawna pay ti nasinggit a bosesna uray sangadeppa laengen ti kaadayona iti inana.

“Beri gud, a, Balong, no kasta,” kinuso ni Ester ti apsay a buok a nanglinged iti nasurok a sangadakulapan a muging ti bugbugtong a bungada kadaydi Jego a nagpukaw bayat iti papanna panangayo idiay Bantay Quinquin-od idi agpito-bulan pay laeng ti tianna, siam a kalgawen ti napalabas. Nagpadara pay idi iti danagna. Ket uray no agkurang iti bulan, nalasatda met nga agina daydi a pasamak iti tulong dagiti kaarruba ken kakabagianna.

“Nakawanhanredka ngarud?” impennekna.

“Ton’ malemkami pay la’ng nga ag-check, ‘Nang. Ngem ammok a naalak amin daydiay… ket no nakalaklaka!” nakatingtinggaw ti panangibaga ni Jethrix iti inana a mangad-adaw iti naikaserola a bulong ti bilunak. Nagtarusanna a pinidut ti bangkito nga us-usaren ni inangna a mapan makiseksekka ket nagbatayanna a nagbuggo iti bangsal a kawayan nga imbalbalin met laeng ti inana.

“Ket ‘tay bag-mo ngarud, nangipanam?” intaliaw ni Ester iti agpatpatigerger iti aglugadlugad a bangko iti sango ti lamisaan a naaramid met laeng iti kawayan. Inamuyna ti kasla nagraepan iti uban a buokna. Iti panangtakalna iti bugguong a munamon iti panakkelen a garapon, medio inyapputna ti nagpapasan ti kapuyo a dakulapna iti natayag nga agongna.

“Imbatik idiay room-mi, a. Nakadagdagsen met dagidiay librok!” tinaliaw met ni Jethrix ti inana a mangpetpettaken iti kumkumbet a kamatis. “Awan mangala idiay ta saan a pastreken ni prinsipalmi ti agtatakaw.”

Immala a talaga iti amana a natalek, nakuna lattan ni Ester iti nakemna. Ngem limmag-an ti riknana a nakaammo a saan met gayam a nakapsut ti utek ti ubingna a kas iti daydi nagpukaw a no read- no write.Uray saanna unay a maisursuro kadagiti leksionna, adu latta met ti atiwen daytoy ubingna. Agasem, maika-kinse idi kallabes a panagseserra. Agduapuloda met ngata idi nga agkaklase.

KAMALMANNA, kasla nakumel ti rupa ni Jethrix a napasungadan ni Ester. ‘Dina masinunuo no ti kadagsen ti bag nga aw-awiten daytoy wenno ti iggemna a papel ti Grade IV ti makaigapu.

“’Nang, zero-nak, yo’” makaluluasit ni Jethrix. Innala ni inangna ti awitna a bag.

“Ne, apayen! Kunak man la no linaklakam dayta test-yo, Nakkong?” uray la nagdalluyon ti kuretret iti muging ni Ester.

“Sabali met gayam, yo’,” dandani saan a simngaw ti ti boses ni Jethrix. Inyawatna ti nakupinkupin a papel sa nagtartaray a napan simpok iti ayan dagiti agkikibin a pasakuati iti abay ti agrengrengngat a kinelleng.

Minuregregan ni Ester ti uk-ukradenna a papel. Tinengngelna ti angesna a kasla adda sibsiblokanna a mangngallong a pusa ket daytoy ti nasukalanna:

1. tseyr       X
2. teybol     X
3. blakbord X
4. pensil      X
5. peyper    X

---GIBUSNA---