TI MANOKKO: Daniw a Para Ubbing

TI MANOKKO

Adda manokko a puraw

Ginalutak iti rutrot

Inggalutko 'diay sirok

Pallot a pallot!

Kastoy met iti panangidaniw ti maysa nga ubing:

TI MANUKKO

Adda manukko a puyaw

Ginayutak ti yutyut

Inggayutko 'diay siyuk

Payyut a payyut!

(ita, padasenyo man met nga ibasa iti napigsa aglalo 'ta maikadua... hehe!)

*BINULODKO LAENG DAYTA MANOK

AY, ANGKUAN

*NABULOD LAENG TI LADAWAN ITI INTERNET

Nalpas ti bilang,
Nagriaw ti natinnag:
"Siak ti agtugaw!"


"Ay, sinuitikdak!"
Inraed ti gimmatang
Butos ni Angkuan...


"Ayna, kompari,
Indakdakkelmo komat'
Inyarikapmo!"


"Uray ta simrek,
Komarik a nagaget
Nga asawam met!"


Ket nalanitan
Subsob ti nakaraman
Arbis ti grasia.


Mano a tawen
Ti palabsentay' manen--
Diak maawatan!


Siak, sika, 'suda!
Kaanonto pay ngata
A makapudno?

--DM Fillomena Yabes

ITI LINONG-PAGURAYAN

Linumbaannak ti kasla dissuor a tudo

Iti maluklukasanen a lulonan

Ti agkabannuag pay laeng a linong-pagurayan

A kinitikitan ti agkabagis a kaibaan ken santilmo… 

Ti init binulladanna ti langit nga umis-isbo:

Ay, aganak manen ti kaibaan

Ket kaasi latta ti pagbagasan a mataktakawan--

Kirad laeng ti nasarangsang kalpasan ti tudo iti Mayo.

Iti linong-pagurayan, maiwalin ti bitbitko a pasensia

Kadagiti babbaro a nakiturno ken lallakay nga estambay

A mangibabaut iti dais ti tiltiliwenda a suerte

Ay, ad-adu pay ngem tinukel ti mapasag a tudo

          ti pannakapaay

Tunggal agmulagat ti agtaltalatal a namnama--

Makutoranda iti kaadut' buttaw ti linong

          dagiti padak nga agur-uray.

(Derick Marcel F. Yabes)
 Bannawag051611

 *NABULOD LAENG DAGITI LADAWAN ITI INTERNET

DITOY PUSOK AGAYAMUOMKA

O, adtoy manen ti tudo, Biagko
Ngem naatap lattat' arakupmo
Adtoy a kimteren ti namnama 
Inuduam koma't panangilala

No laeng koma ipalubosmo
'Toy dakulapko't manaripato 
Napnuannak man iti kinanumo
Appupuenka iti kinadungngo 

Ibuloskot' langit a rinibo
Iti rosasmo a maganggango 
Tapno agbukar ken agsantakka 
Ditoy pusok agayamuomka 

O, adtoy manen ti tudo, Dungngo
Il-iliwek barat' arakupmo
Ngem anian a ranggas kinapudno 
Ta addan, addan kakibkibinmo.

--DM Fillomena Yabes

(Nupay saan a makapasa a daniw daytoy, impaskilko latta tapno adda pagpampanunotak a mangpapintasto pay kadagiti sumarsaruno a putarek)

*NABULOD LAENG DAGITI LADAWAN ITI INTERNET

TI PUSAK A GUSING (daniw a para ubbing)

(2nd Prize iti RFAAFIL-2011 ken napili nga idaniw dagiti ubbing a nagsasalip iti Poetry Reading Contest iti maika-43 a GUMIL CONVENTION idi kallabes nga Abril, 2011. Inyalatna ti READER'S CHOICE AWARD iti RFAAFIL itay Hulio, 2012)

Adda pusak a gusing

Ti naganna ket Muning

Lapayagna't nagluping

Ta sobra't kinakusim

Burborna kasla uging

Ipusna kasla ruting

Manmano nga uminum

Ta kabutengnat' danum

Ngem 'toy pusak nalaing

Uray matana't balling

Tukmaannat' masiim

Bao nga agkutkutim

Diak pulos nga agdanag

A makuriban 'toy bag

Ta pusak bantayanna

Aruatek nga agbasa

No siakon 'tay agukag

Leksionko iti papag

Pusak umay agsadag

Tapno makipagukag

No siak 'tay agsuyaab

Agngiaw daytoy pusak

Leksion innak ileppas

Atiwek kinalaglag

Itan ta sinursuruak

'Toy dungdunguek a pusak

Saanen a nakusim

Gusingna, ay, limmaing!

--Derick Marcel F. Yabes

*Mabalinyon a kopiaen, gagayyem, tapno adda isuroyo kadagita ubbingyo. Diyo laeng koma liplipatan 'toy naganko. Panagkunak, napintas met daytoy nga ibasa wenno idaniw iti eskuelaanda...

*NABULOD LAENG TI LADAWAN ITI INTERNET

5 a Daniw

1.

Dimsaag bulan:

Kinibin anniniwan

Kabambantayan.

2.

Timmapog bituen

Iti puseg karayan

Immisem dukiang.

3.

Tuktok niog: billit-tsina

Umariwawa

Samiweng ti agsapa.

4.

Naginat init

Ti amor nagkulagtit

Dawa simmirip.

5.

Ti upa umarikiak

A nakaduktal

Agsisiim a banias!

--DM Fillomena Yabes 
                   (naipablaak iti Bannawag)

*NABULOD LAENG DAGITI LADAWAN ITI INTERNET

6 a Daniw

1.

Diram-osannak

Lanay kabus a matam

Iti sarsardam.

2.

Agkarkarayam

Ditoy rabaw 'toy pusok

Barat' angesmo.

3.

Imnas samiweng

Yap-apros 'ta lailom

Iti bulbulong.

4.

Daton a sabong

Agkan dagiti bituen

Ti ayamuom.

5.

Aglimog ling-et

Ti agpatnag ken tapok:

Mayaplag dam-eg.

6.

Agtapaw amor--

Ikutmo a burburtia

Di agpatingga!

 --DM Fillomena Yabes

(kappessa a daniw 'toy numo iti Bannawag, Pebrero 7, Tawen ti Kuneho)

*NABULOD LAENG ITI INTERNET DAGITI NAARAMAT A LADAWAN

NAKSET TI TANAP

            i
Karayan Dakkel
Kaay-ayo ti buruang
Manipud Magat.

            ii
Simmangbay Tigre
Nakabarbarat' sang-aw
Nakset ti Tanap.

            iii
Ay! Inalun-on
Nagkarayam a rengngat
mais ken pagay.

            iv
Naspak ni gasat!
Di pay naung-ungaran
Inlumlom utang.

            v
Kumarkaramut
Iti kelleng ken koman
Kasla natayan.

            vi
Aniat' reseta
Ti naidalit a daga?
Pagkunnot danum!

            vii
Ti nakatugaw
"State of Calamity!"
Isut' insungbat...

            viii
Awan ti bagas
Rummuar ti bagas-bagas
Pispis mangurat!


--DM Fillomena Yabes

(nai-Bannawag idi Abril 19, 2010)

*NABULOD LAENG DAGITI LADAWAN ITI INTERNET

SEGGA

segseggaanka ken ti Nabileg nga idurduronmo
a naglaon lawag ken sirmata iti masakbayan...

     (agmurmuray iti segga ti inadipen tekkab─
     amusayan ti sinamar a bakruymo.)

        segseggaankan sipud nagallangogan karadakad ti idurduronmo
        ken nagrimat ‘ta Nagan a kasla baggak iti sangalubongan
        ta sika 'tay naanus nga agisursursor iti kinarkarison a namnama
        kadagiti pispis ti kalsada a pagap-aponan dagiti kas kaniak a kawaw a kambas.

        segseggaanka, ket allingagek pammatalged dagiti saltek

        iti isasangbaymo a mangwaknit 'toy nasamek a desdes

        a pagul-uldagak ta siak 'tay pinanawan ti pagtaengan─

        nayaw-awan dagiti mangidaldalan a di nakasurot iti desdes ti adal.

        segseggaanka ken ‘tay sinangalmo a karison ti lawag
        ta nalidem 'toy pagkarkarayamak a pingping ti lubong─
        makullaapan naganus a panunot a mangikalintegan killo a wagas
        no kastan nga umkis ti kaunggan iti gurruod ti gilingan.

        segseggaanka ken ti arapaap nga awit ‘tay karison ti sirmata
        ta ammok nga adda imnas nga itden ti pannakaawat
        kadagiti ibalbalikas dagiti baniaga a numero ken letra
        tapno maanagko met koma ti pudpudno a maris ti biag.

        segseggaanka, ngem no bilang marigatankan a dumanon
        mangibaonkanto koma ti ad-adu pay a mangiduron kadayta panggepmo
        ta diak kayat nga aglumot bukel ti kinamaag ditoy darak:
        ket kupinekto iddak a karton iti isasalpak instrumentom a karison.

    (wen, maawatakton bugas dagiti nagduduma a libro
    a nabudakan iti narangrang a lampara ken krus, Mang Efren!)

masakbayan. sirmata. lawag─ linaon.

idurduronmo. Nabileg─ segseggaak.


--Derick Marcel F. Yabes
 (umuna a gunggona iti pasalip ti AVAIL, 2010)

*NABULOD LAENG DAGITI LADAWAN ITI INTERNET

ALIMBASAG

Agkissiw ti panggep

agkalkaling-etan nga ima

ta agkapsut, agkumot

pluma a tukmem.

Agbungil ti agdadamo

iti appupot' panganan

agunnoy ti mawaw a barukong

sangkapirgis a binulong.

Agmukat ti mata

a mangpangisit iti dana

ket agkirem, agdungsa

malpaag rikna.

Mabartek iti ulimek

alimbasagen a saltek

ngem matalimpungaw ti essem

iti kuddot salemsem.

Agriing ti gagar

a mangkulding iti bangabanga--

pamedped waw ti barukong

ken taraon ti pluma.

Uyawen ti sarming

bunga a nagluom

iti tuktok agong!

--Derick Marcel F. Yabes

(naipablaak iti Bannawag iti bilang a Pebrero 1, 2010)

*NABULOD LAENG DAGITI LADAWAN ITI INTERNET