Kumeddel latta ti pul-oy
amian
Saan a kabaelan a bugawen ti agin-inudo
A kinirog a bagas iti saklot
Ti pumirpirak ti pudawna a lusa
Nga idingpidingpil iti agbettabettak a bibig
Ngem saan nga aglunit
ti sugat
Iti rikna ken rengngat iti natikag
A puso a padpadasen a dayasan
Ti naanem-em a tarakitik ti lagip…
Tunggal lidok iti kape
Maipabulon ti napait a kinapudno;
Bimmaawen ti ayat iti nagbaetanta
Sipud inulilam ‘toy tasa
Ditoy barukong ti lamminen
Labus a lamisaan.
Ita a Paskua, kumeddel ti pul-oy
Nasalemsem ngem agur-urayak
Kasta met nga agur-uray kaniak
‘Tay balatong a mapablad.
(Bannawag, Disiembre 27, 2010)
No comments:
Post a Comment