Monday, April 30, 2012

FOR ADULTS ONLY: Debut Album ni Maestro Alexander Reyes Barut, Umalimpatoken!

Kayatyo kadi ti maaddaan iti kopia ti de-kalidad nga Ilokano a kankanta, Kailian? Padasenyo man ketdi a tawayan ti musika ti maysa a maestro iti Physics (saan a Phy-sex, wen). No kursonadayo, kontaken wenno i-private message-yo laeng ni Maestro Alex Reyes Barut wenno ni Ariel Sotelo Tabag iti facebook tapno maammuan no kasano ti panagorder.




Saanyon a baybayagen no interesadokayo, Kailian, ta narigat ti maibusan kadaytoy namnamsek iti ayat ken ray-aw nupay adda sangkabassit naitibnok a liday kadagiti sumagmamano a binatog nga ay-ayoen ti mangin-indayon a sonata manipud kadagiti agkakalaing a kompositor ti Ilocandia a dinanggayan pay ti sumagmamano a mannurat ken mannaniw iti Bannawag Magazine.




Saan nga ang-angaw daytoy ta pimmutar met 'toy numo iti liriko ti maysa a samiweng (Sabong iti Facebook) a nairaman kadaytoy umuna unay nga album ni Maestro Alexander Reyes Barut nga improdius ti nalatak nga Aweng Records a kukua ni Prince of Ilocano Song Vhen Bautista a.k.a. Chino Romero. Nagmayat man ti pinnasungbat da Idol Vhen ken Angkol Alex (awagmi kaniana nupay saan met unay agiinnaddayo dagiti langami. He-he!) kadagiti dadduma a sonata.















Kangrunaanna, maysa pay a nangpalapsat iti linaon daytoy nga album a For Adults Only ket ti pannakidueto dagiti nalatak a kumakanta met laeng a da Noraline Domingo ken Jerameel Perucho Contreras sa pay la intira ni Angkol Alex 'tay "for adults only" (makaparegreg iti sapin) a bosesna kadagiti narration iti nasasam-it a sonata. Saan ketdi a bastos wenno sinsinan ti linaon daytoy nga album ta putar dagiti manakem para met laeng kadagiti pada nga addaan nakem... ubbing man wenno nataengan.


Ay, ket ania pay ngarud ti sapulem, Kailian? Agorderkan, ala!



BASAEN PAY:





Pangramanan:

(Katiken laeng ti link iti baba tapno mangngegan daytoy a sonata)
For Adults Only (Ilocano Song with Lyrics)- Alexander Reyes Barut
Music and Lyrics by: Vhen Bautista



*Pammadayaw ken ni Maestro Alex Reyes Barut dagiti nausar a ladawan

Saturday, April 14, 2012

Intayon Maki-GUMIL Idiay Bacnotan, La Union!

IPAPAN ITI VENUE, SEGUN KEN NI APO SEC GEN DJUNA ALCANTARA:
Agdissaag iti Sapilang, Bacnotan Junction, appo. No aggapu iti abagatan, labsan bassit ti Bacnotan town proper. Adda maluganan nga agpa-DMMMSU. (No jeep, P10.00; P25-30 pesos, no tricycle a maarkila). Masarakan ti Unibersidad 2 a kilometro dayaen ti national highway. Addanto shuttle a mangsabet kadagiti GUMIL delegates, ngem iti laeng malem ti Abril 20, 2:00 p.m - 6:00 p.m.

                                                                        --ARIEL S. TABAG




TEMA: "Ni Mannurat a kas Mannursuro"





Abril 20, 2012 Biernes - Panagsangpet ken panagrehistro dagiti delegado ken sangaili






Abril 21, 2012 Sabado -
"Aldaw ti Literatura"

Abril 22, 2012 Domingo -
"Aldaw ti Panagpipinnadigo iti Kapanunotan





1: 00 PM, Abril 22, 2012 - Panagpipinnakada ken panagaawid dagiti delegado

(Pammadayaw ni Ariel Sotelo Tabag)

Thursday, April 12, 2012

CAPACITY

Ababa nga Ababa a Sarita (Imbiit a Sarita)

"Sakbay koma a nagsakayka, nagdamagka koma pay nga umuna. Saan a kasta a daddadaelem ti orasko," ingngerngerna.





"Sigurado manen 'ta batil-patung!" insanapsap ti panunot ni Sabas. Agasem, nayat iti "capacity" daytoy nailuganna ita a dimsaag iti Dangaw Transit itay. Manipud nasursurona ti istayl dagiti traysikelan ditoy Siudad ti Tuguegarao, kanayonen a mamutittit ti bolsana. Mabalin payen a pagilig-isan iti kuto ti boksitna uray kasla palito laeng no maiyabay kadaytoy nakabakbaked ken kasla gimmubang nga apuyen a pasaherona.

"Ditoyen, bro," inkalbit ti lalaki a nakadungkog iti uneg ti saydkarna. Kasla Kenny Rogers ti boses daytoy ngem no iti langa, kasla kabuteng a pagtubuan ti barbas ti nakalinlinis a rupana. Kasla met Wesley Snipes ti panagbubuok ken ak-akadna. Impaigidna ti traysikel iti batog ti kakomanan. Awan makita a balay iti asideg.
       
"Mano itayen ti pagpletek, Manong," kinuna ti lalaki iti nalamiis a boses.
       
"Capacity laeng, ading." Nadayaw met daytoy, naisipna.
       
"Ania kadi dayta capacity, Manong?" Inunton manen ti lalaki. Nagmayat man ti panangkepkep ti nangisit a balat a diaket iti kasla natubtubay a pammagi daytoy. Ngem naguguapoak latta, impangas ni Sabas iti bagbagina. Agasem, no naluklukmeg la bassit, maysa laengen a digosan ti pangabakan ni Coco Martin kaniana! Uray agdadatanto met laeng a pimmalatang ti agongna.
       
"Umanay kadi daytoyen, Manong?" Inyawat ti lalaki ti naranghado.
       
"Ay, agkurang, a," medio ngimmato ti bosesna. "Masapul a bayadam ti lugar a malaon 'toy luganko. Agkurangka pay treinta," insilpona.
       
"Ket no dies sa met laeng ti plete, 'Nong, nalamiis latta ti boses ti lalaki nga iti likudanna mangrugin nga agmurmuray ti sinamar nga inulsan ti naingpis nga amor.
       
"Sakbay koma a nagsakayka, nagdamagka koma pay nga umuna. Saan a kasta a daddadaelem ti orasko," ingngerngerna. Bimmaba iti traysikel ta dimmagsen ti pus-ongna.
       
"Agkurang met, 'Nong," medio timmangken ti boses ti lalaki. "Porti-payb laeng 'toy dalak!" Inuksobna ti diaketna.
       
Saan a naituloy ni Sabas ti panangipatan-awna iti karuotan ti tarakenna gapu iti nasiputanna a nakasabbikel iti lalaki. Nagayus ti nabara iti sakaananna.#

Buttered Mussels (Tahong) with Celery

Courtesy of LJ Galleta
(Nabasana kano met laeng iti  saannan a malagip a website...He-he!)

 

 
Simple laeng nga isagana g'yem; ti kasapulam:


-butter
-onions
-celery
-lemon/calamansi juice
-bassit usit a ginger,
-sangatagay a serbesa
-salt & pepper to taste
-tahong, op kors

 
Tunawem diay butter, after which, layetem a paggigiddanen diay onions, ginger, celery (mangibati ka pay laeng bassit 'diay celery...) 

Next, ipisokmon diay nadalus a mussels ken serbesa; after 5 minutes, nayonam bassit iti butter ken ipisokmo metten diay nabati a celery; tantiaemon diay ipatedtedmo a calamansi or lemon juice. Kalubam diay kaserola for about 15 more minutes or so...

After that, warakiwakamon iti salt, pepper, betsin base diay kayatmo nga apgad na...

Adawemon, aggaokan iti innapuy wenno ipasayagmon diay platter dita lamisaan a pagtotoningan yo...

Ipapasyon ti agsida wenno agpulotan.

^_^ Enjoy!:-)